💥अन्नाचा आदर करावा💥

                                               💥अन्नाचा आदर करावा💥
               ★अन्न वाया जाणे म्हणजे नक्की काय हे आजकाल मोठमोठ्या जेवणावळींच्या ठिकाणी नित्य पहावयास मिळते.अर्धवट खाऊन सोडून दिलेलं अन्न थाळीमध्ये पडलेलं असतं .जेवणात बदल हवा म्हणून हॉटेलमध्ये जेवतांना अनेक पदार्थ मागवायचे,हवं तेवढं खाऊन बाकीच टाकून दिलं जातं. वाया जाणाऱ्या एवढ्या अन्नात कितीतरी उपाशी परिवार भरपेट जेवले असते.
           ★अन्न हे पूर्ण ब्रम्ह असून पानात घेतलेले सगळे पदार्थ खाल्लेच पाहिजे ही सक्तीची शिकवण आजच्या पिढीला दिली जाते की नाही ? कच्या बच्यांसाठी दररोज अन्नाची सोय करतांना ८०% जनता अक्षरशः जीवाचं रान करते. मोलमजुरी,काबाडकष्ट करून आपल्या अन्नाची सोय करणारे एकीकडे कायम चिंताग्रस्त असतात तर अन्नाची किंमत नसलेले अंगात माज आल्यासारखे अन्नाची नासाडी करतात . इतके अन्न वाया जातांना पाहून हे अस्वस्थ नाही होत ? किती विरोधाभास आहे हा ! ★ लहानपणी मुलांना एका दयाळू राजाची गोष्ट सांगितली जाते.त्या राजाला आपल्या प्रजेची मनापासून काळजी होती .माझ्या राज्यात एकही नागरिक उपाशी झोपू नये यासाठी त्याचे सतत लक्ष असे .प्रजा सुखी,आनंदी व सुरक्षित राहण्यासाठी तत्पर असणे हेच राजाचं कर्तव्य आहे ,अस त्या राजाचं मत होतं. ★भविष्यात असे दयाळू राज्यकर्ते असतील ? ?
          ★गरजेपेक्षा जास्त उत्पन्न असणाऱ्या व कमी श्रमात अती श्रीमंत असणाऱ्या २०% जनतेला अन्न मिळवण्यासाठी काबाडकष्ट करावे लागत नाहीत हे मान्य आहे पण अन्नाची किंमत सुद्धा समजू नये याचं फार वाईट वाटतं . आपल्या शरीराचं सुयोग्य पोषण करणाऱ्या अन्नाचा आदर करण्याची शिकवण बालपणीच देण्याची गरज आहे .अन्नाचा आदर करावा. लेखसंग्रह :घे उंच भरारी. (2016) लेखक : सुहास सोहोनी
अमरावती
मोबा : 8626060646